Viktima, Elton Çiço
Grupi i cili heton vrasjen e 36-vjeçarit Elton Çiço, objekt të hetimi ka edhe një pistë tjetër. Burime nga ky grup bëjnë të ditur se dyshohet se vrasja e Çiços mund të ketë lidhje edhe me prishje pazaresh të mundshme të drogës.
Në këtë pistë të mundshme hetimi, grupi hetimor ka arritur edhe pasi prokuroria dhe policia thonë se, ka të dhëna dhe informacione se viktima të jetë i përfshirë në këtë veprimtari.
Hetuesit thonë se telefoni, pistoleta dhe sendet e tjera personale të Çiçës, të cilat u zhdukën nga vendi i ngjarjes, do të ishin një ndihmë e madhe për hetimet. Këqyrja e telefonin dhe komunikimet, që mund të gjendeshin në të, do t’i jepnin indice policisë për të kanalizuar hetimin.
Ndërkohë krahas pistës së re, vazhdojnë veprimet edhe për pistën e hakmarrjes për shkak të grabitjes së prindërve të viktimës në Tepelenë. Por nga pyetja e familjarëve, të personave të cilët dyshohet se janë pjesë e kësaj historie, nuk janë përfituar të dhëna që u ndihmojnë hetimeve.
Një tjetër pistë ku janë fokusuar hetuesit është edhe ajo e fajdeve, por që deri tani thuajse nuk është gjetur asnjë element që të bëjë prokurorët të vazhdojnë veprimet hetimore.
