Ne foto, gruaja dhe i biri i Mirosh Djaloshit ne gjykate
Gjykata e Durrësit vendosi sot arrest me burg për dy djemtë dhe bashkëshorten e ish-kryeplakut të fshatit Shkallë në Manzë të Durrësit Mirosh Djaloshi, i cili u vra në 18 mars në shtëpinë e tij.
Bardhe Djaloshi e shoqja e viktimës u shfaq me lot para togave të zeza. Ajo dhe djali i saj i madh Arbani 26 vjeç do të qëndrojnë në burg pa afat, të paktën deri në përfundim të hetimeve për vrasjen, ndërsa i vogli 16-vjeçar F.Djaloshi do të qëndrojë në qeli për 40 ditë, si masë sigurimi e vendosur nga gjykata.
Djali i madh Arbani ka deklaruar se është autori i vrasjes e cila u krye në oborrin e shtëpisë së tyre pas orës 01:00, kur Mirosh Djaloshi ishte kthyer i dehur.
“Unë isha në gjumë atë ditë dhe ishte ora 1 e natës. Babai nuk kishte ardhur ende në shtëpi. Rreth orës 1 e ca dëgjova një kollitje jashtë shtëpisë dhe dola në oborr të shihja. Pashë babanë që ishte i dehur. Ai kur më pa nisi të më shante dhe mu vërsul. Iu kujtua një ngjarje e para disa viteve kur unë u arrestova për një vjedhje të shkollës. “Hajde këtu ti hajdut m…”, më thirri babai dhe më ndoqi me një sfurk që të më godiste.
Unë vrapova drejt stallës së lopës dhe aty gjeta një hu dhe e godita dy herë në kokë. Ai ra në tokë dhe më duket se kishte vdekur. Më pas u ktheva të flija. Në mëngjes më zgjon nëna dhe më thotë se babai nuk kishte ardhur ende në shtëpi. Unë e dija se mund ta kisha vrarë, ndaj nuk fola. Lajmërova xhaxhanë dhe e gjetëm aty ku e kisha lënë. Kisha frikë ta pranoja që në fillim krimin”
