Partia Demokratike ka reaguar pas ndalimit në pikën kufitare të Qafë Thanës të tre deputetëve të koalicionit shqiptar VLEN nga Maqedonia e Veriut, duke e cilësuar ngjarjen një skandal diplomatik dhe një akt të paprecedentë.
Në një deklaratë për mediat, kryetari i PD-së, Sali Berisha, akuzoi kryeministrin Edi Rama se ka urdhëruar ndalimin e deputetëve Bekim Çoku, Adnan Hazizi dhe Hasim Myrtezani, të cilët, sipas tij, udhëtonin me pasaporta diplomatike.
“PD dënon me forcën më të madhe këtë akt të shëmtuar të Edi Ramës. Ky është një veprim antishqiptar i paprecedent që nga koha e Enver Hoxhës”, deklaroi Berisha.
Sipas tij, tre përfaqësuesit e VLEN u trajtuan “si terroristë” dhe jo si deputetë të zgjedhur të shqiptarëve në Maqedoninë e Veriut, ndërsa pretendoi se ndalimi i tyre është bërë në kundërshtim me marrëveshjet mes dy vendeve dhe konventat ndërkombëtare.
Berisha tha se ky veprim dëmton marrëdhëniet e fqinjësisë së mirë me Maqedoninë e Veriut dhe e cilësoi atë si një përpjekje të qeverisë për të zhvendosur vëmendjen nga protestat qytetare në Shqipëri.
“Ky akt dëshmon një goditje të rëndë të fqinjësisë së mirë me vendin fqinj dhe përbën një përpjekje vulgare për të fajësuar fqinjët dhe të tjerët për protestën rinore qytetare më të fuqishme që ka njohur vendi në 35 vitet e fundit”, u shpreh kreu i PD-së.
Në përfundim të reagimit, Berisha krahasoi sjelljen e kryeministrit Rama me atë të regjimeve autoritare, duke deklaruar se “dënimi i tij është pa shpëtim, pa kthim”.
