Prokuroria e Posaçme kundër Korrupsionit dhe Krimit të Organizuar (SPAK) ka përfunduar hetimet dhe ka dërguar për gjykim katër shtetas të huaj, të akuzuar për pastrim parash nëpërmjet një skeme të dyshuar që përfshinte kompani të regjistruara në Shqipëri, transaksione financiare të dyshimta dhe investime në pasuri të paluajtshme.
Të pandehurit janë Domingo Romillo Iriarte, Mihaela Munteanu Manole, Alvaro Romillo Castillo dhe Doris Pere. Sipas SPAK, tre të parët akuzohen për pastrim parash në kuadër të një grupi të strukturuar kriminal, ndërsa Doris Pere për pastrim parash në bashkëpunim.
Nga hetimet ka rezultuar se gjatë vitit 2024 ata krijuan tre shoqëri tregtare në Shqipëri – “Wingwort” sh.p.k., “Wortnova” sh.p.k. dhe “Wortend” sh.p.k. – të regjistruara me kapital minimal dhe në të njëjtën adresë. Sipas organit të akuzës, këto kompani nuk zhvillonin aktivitet real ekonomik, por shërbenin për futjen në ekonominë formale të fondeve me origjinë të dyshuar kriminale.
SPAK ka evidentuar transaksione bankare me vlera të konsiderueshme, transferta ndërkombëtare pa dokumentacion justifikues, fatura të dyshuara si fiktive, si dhe investime në automjete luksoze dhe pasuri të paluajtshme.
Sipas dosjes hetimore, një pjesë e fondeve është përdorur për blerjen e dy pronave në zonën e Dhërmiut, me sipërfaqe totale prej 23.16 hektarësh, për një vlerë të deklaruar prej 1.62 milionë eurosh. Nga ekspertimi ka rezultuar se vlera reale e tregut ishte më e lartë se ajo e deklaruar në kontratat e shitblerjes.
Hetimet janë mbështetur edhe në informacion të siguruar përmes bashkëpunimit me autoritetet gjyqësore të Spanjës, ku disa prej të pandehurve rezultojnë nën hetim për vepra penale të mashtrimit.
Sipas SPAK, Domingo Romillo Iriarte ka pasur rolin drejtues në organizimin dhe funksionimin e skemës, duke administruar kompanitë, orientuar qarkullimin e fondeve dhe vendosur për investimet. Ndërsa Mihaela Munteanu Manole dhe Alvaro Romillo Castillo dyshohet se kanë kontribuar në krijimin e pamjes së ligjshme të aktivitetit ekonomik përmes roleve të tyre në kompanitë e regjistruara në Shqipëri. Doris Pere dyshohet se ka ndihmuar në funksionimin e skemës duke kryer veprime administrative, bankare dhe organizative.
Mbi pasuritë në pronësi të Domingo Romillo Iriarte, Alvaro Romillo Castillo dhe Mihaela Munteanu Manole është vendosur masa e sigurimit pasuror “sekuestro preventive”.
