Ka nisur protesta e 14-të qytetare para godinës së Kryeministrisë, ku mijëra qytetarë janë mbledhur në bulevardin “Dëshmorët e Kombit” për të kërkuar dorëheqjen e kryeministrit Edi Rama.
Tubimit i janë bashkuar protestues nga qytete të ndryshme të vendit, si edhe shqiptarë të ardhur nga diaspora. Bulevardi kryesor i Tiranës është mbushur me qytetarë, të cilët kanë marshuar drejt Kryeministrisë me pankarta dhe thirrje kundër qeverisë.
Mes pjesëmarrësve kanë qenë edhe banorë dhe aktivistë nga Rrjolli i Lezhës, të cilët gjatë ditës zhvilluan një aksion për heqjen e gardhit dhe telave me gjemba në zonën ku kundërshtojnë ndërtimin e një resorti turistik.
Një prej aktivisteve deklaroi nga podiumi se protestuesit kishin sjellë me vete një pjesë të gardhit të hequr në Rrjoll si simbol të rezistencës së tyre.
“Ne po vazhdojmë një betejë madhështore për t’i rikthyer dinjitetin Shqipërisë dhe për t’i dhënë fund tranzicionit. Arritëm një fitore të vogël në Rrjoll, por nëse nuk çlirojmë Shqipërinë, nuk kemi fituar. Kemi sjellë një pjesë nga gardhi në Rrjoll që ata të kuptojnë se nuk ka gardh që ndan shqiptarët”, u shpreh ajo.
Aktivistët prezantuan gjithashtu një instalacion simbolik me këpucë, të cilat sipas tyre përfaqësojnë shqiptarët që janë larguar jashtë vendit ndër vite.
Një nga momentet që tërhoqi më shumë vëmendje ishte pjesëmarrja e një vajze 7-vjeçare, Olivia, e cila iu bashkua protestës së bashku me familjen e saj. Me një pankartë dhe mesazhin “Jep dorëheqjen!”, vogëlushja u kthye në një nga figurat më të komentuara të tubimit.
Protesta po vijon para Kryeministrisë, ndërsa organizatorët kanë bërë thirrje për qëndresë qytetare dhe pjesëmarrje masive edhe në ditët në vijim.a.b
