Kryetari i Partisë Demokratike, Sali Berisha, deklaroi në Kuvendin Kombëtar të PD-së se demokratët ndodhen në “kilometrin e fundit” të betejës së tyre politike dhe se beson plotësisht te fitorja e opozitës. Në fjalën e tij, Berisha vlerësoi sakrificat dhe qëndresën e demokratëve gjatë viteve të fundit, duke theksuar se pa besimin te fitorja nuk do të kishte marrë përsipër drejtimin e partisë.
“U jap fjalën e nderit se kurrë nuk do merrja përsipër t’u drejtoja ju po të mos besoja tek fitorja. Ky besim buronte nga guximi, vendosmëria dhe atdhetaria juaj”, u shpreh Berisha para delegatëve.
Kreu i demokratëve tha se Partia Demokratike ka përmbushur një nga detyrimet e saj kryesore, mbrojtjen e votës, ndërsa akuzoi qeverinë për manipulimin e procesit zgjedhor dhe kontrollin e mediave. Sipas tij, opozita është përballur me një qeveri që ai e cilësoi si “mafioze”, me kartelet e drogës dhe me një sistem propagandistik që synon të godasë kundërshtarët politikë.
Berisha deklaroi se PD nuk është më në pozita mbrojtëse, por në fazën përfundimtare të rrugëtimit drejt rikthimit në pushtet. Ai theksoi se objektivi kryesor i demokratëve në këtë moment është ripërtëritja e partisë dhe forcimi i saj si alternativë qeverisëse.
“Detyra jonë numër një që ua kemi borxh demokratëve dhe shqiptarëve është ripërtëritja. Ripërtëritja e partisë është dhe duhet të jetë vepra jonë madhështore. Duhet të jetë vepra jonë për të ripërtërirë nesër Shqipërinë dhe për t’u rikthyer shqiptarëve votën e lirë”, tha ai.
Në fjalën e tij, Berisha u ndal edhe te programi politik i PD-së, duke kundërshtuar pretendimet se opozita nuk ka një projekt të qartë për vendin. Ai solli në vëmendje disa prej arritjeve të qeverisjeve të mëparshme demokrate, si anëtarësimi i Shqipërisë në NATO, heqja e vizave, ndërtimi i Rrugës së Kombit dhe integrimi në institucionet europiane.
Sipas Berishës, Partia Demokratike mbetet “partia e ëndrrave të shqiptarëve” dhe synon të ndërtojë një vizion të ri për vendin, me projekte që, sipas tij, do të tejkalojnë edhe arritjet e së kaluarës.
Kuvendi Kombëtar i PD-së po zhvillohet nën moton “Ripërtëritje”, ndërsa në fokus të tij janë zgjedhja e strukturave të reja drejtuese dhe miratimi i ndryshimeve statutore të partisë.
