Ka nisur punimet Kuvendi Kombëtar i PD me sloganin ‘Ripërtëritja’ ndërsa bëhet edhe zgjedhja e Këshillit të ri Kombëtar dhe ndryshimet statutore.
Partia Demokratike po zhvillon sot Kuvendin Kombëtar, forumin më të lartë vendimmarrës të saj, i cili mbahet në Pallatin e Kongreseve në Tiranë, duke nisur nga ora 10:00, nën moton “Ripërtëritje”.
Ky Kuvend vjen pas përfundimit të procesit zgjedhor në degët e partisë në të gjithë vendin, si dhe pas referendumit të votëbesimit që rikonfirmoi Sali Berishën në krye të PD-së.
Në qendër të punimeve do të jetë zgjedhja e 200 anëtarëve të rinj të Këshillit Kombëtar, ndërsa delegatët do të shqyrtojnë dhe votojnë edhe paketën e ndryshimeve statutore të miratuara unanimisht nga Kryesia e partisë dy ditë më parë. Propozimet për ndryshimet në statut do të prezantohen nga drejtuesi i Grupit Parlamentar të PD-së, Gazment Bardhi.
Punimet e Kuvendit do të drejtohen nga një komision i kryesuar nga Ivi Kaso, ndërsa momenti qendror i aktivitetit pritet të jetë fjala e kryetarit të PD-së, Sali Berisha. Pas saj do të hapet procesi i votimit për anëtarët e rinj të Këshillit Kombëtar, i cili do të zhvillohet në ambientet e Pallatit të Kongreseve.
Në rendin e ditës janë përfshirë gjithashtu prezantimi i platformës për modernizimin dhe dixhitalizimin e partisë nga Grigels Muçollari, si dhe platforma për organizimin e diasporës, e cila do të prezantohet nga Nikola Kedhi.
Punimet do të përshëndeten edhe nga përfaqësues të partive simotra dhe personalitete ndërkombëtare, të cilët do të përcjellin mesazhet e tyre përmes videomesazheve ose pjesëmarrjes direkte.
Pas zgjedhjes së Këshillit Kombëtar, në ditët në vijim pritet të vijojë procesi për përzgjedhjen e anëtarëve të Kryesisë dhe Sekretariatit të PD-së, duke përmbyllur kështu fazën e riorganizimit të partisë më të madhe opozitare në vend.
Kuvendi u hap me fjalën e Erisa Bajazitit, pas së cilës delegatët vptuan për Komisionin e Drejtimit të Punimeve dhe Sekretariatin Teknik. Më pas do të mbajnë fjalën të ftuarit ndërkombëtarë, kryetari i PD-së Sali Berisha, si dhe drejtues të tjerë të partisë që do të paraqesin rezolutat, ndryshimet statutore dhe projektet organizative të PD-së. Procesi i votimit do të shoqërohet me diskutime dhe debate nga delegatët pjesëmarrës në Kuvend.a.b
