Ilir Meta ka reaguar pas seancës së zhvilluar në GJKKO, duke pretenduar se Prokuroria ka rrëzuar akuzën kryesore ndaj tij lidhur me një lobim të dyshuar prej 1 milion dollarësh në SHBA për sigurimin e një fotografie me presidentin amerikan Donald Trump.
Në një reagim publik, Meta u shpreh se gjatë gjykimit prokurori ka pranuar se bëhet fjalë vetëm për një pagesë prej 15 mijë dollarësh ndaj kompanisë “McKeon Group”, të cilën ai e konsideron të ligjshme dhe të deklaruar më herët si publikisht, ashtu edhe në SPAK.
Sipas ish-presidentit, kjo shumë ishte bërë e ditur prej tij që kur është marrë në pyetje për këtë çështje rreth tre vite më parë.
Meta komentoi gjithashtu edhe raportimet e mediave të huaja për dosjen në fjalë, duke përmendur revistat “Mother Jones” dhe “Kronen Zeitung”, për të cilat pretendon se kanë publikuar lajme të rreme që, sipas tij, u përdorën për ngritjen e akuzave dhe izolimin e tij politik për 19 muaj.
Postimi i plotë i Metës:
“Sot, në seancën radhës të gjykimit në themel, vetë Prokuroria rrëzoi akuzën kryesore ndaj meje për gjoja lobimin 1 milion USD për një foto me Presidentin Trump.
Para gjykatës prokurori pohoi se bëhet fjalë vetëm për një pagesë të ligjshme prej 15 mijë USD për McKeon Group, pikërisht ajo që kam deklaruar publikisht, por edhe në SPAK, që para 3 vitesh, kur jam thirrur për këtë çështje.
Shikoni tani titujt e lajmeve të rreme të “Mother Jones” dhe “Kronen Zeitung”, të sponsorizuara me paratë e inceneratorëve dhe të mafias ndërkombëtare, mbi të cilat u ndërtua kallëzimi i rremë dhe akuza kryesore kundër meje, akuzë mbi të cilën u mbështet rrëmbimi dhe izolimi im politik prej 19 muajsh, akuzë që sot u rrëzua nga vetë Prokuroria.
Durim! Edhe akuzat e tjera do të çmontohen njëra pas tjetrës.” a.b
