Gjykata Administrative e Apelit ka vendosur që seanca gjyqësore për kryebashkiakun e Tiranë, Erion Veliaj, të zhvillohet pjesërisht e hapur, me praninë e gazetarëve por pa praninë e kamerave.
Veliaj kishte kërkuar transmetim live të procesit.
Gjatë seancës, avokati i Veliajt, Plarent Ndreca, kërkoi që procesi të transmetohej drejtpërdrejt, duke argumentuar se publiciteti i seancës është një parim kushtetues dhe se media duhet të ketë mundësi të ushtrojë lirisht veprimtarinë e saj.
“Nuk jemi në kushtet për të vënë në vlerësim këtë fakt, të drejtën e çdo qytetari për të qenë në një seancë gjyqësore. Parimi kushtetues i publicitetit të seancës është parim që nuk mund të ndalohet vetëm kur cënohet integriteti i një personi, i sallës apo i zhvillimit të procesit gjyqësor”, u shpreh Ndreca gjatë fjalës së tij.
Ndërkaq Prokurori Ols Dado ka kërkuar kufizimin e transmetimit të procesit, për shkak se ai transmetim ndikon procesin.
Megjithatë, gjyqtari Hazbi Balliu vendosi që seanca të zhvillohej pa praninë e kamerave, ndërsa në sallë do të lejohen vetëm gazetarët.
