Ëndrra e Kosovës për një kualifikim historik në Kupën e Botës 2026 u ndal në Prishtinë, pasi “Dardanët” u mposhtën 0-1 nga Turqia në finalen e play-off-it.
Ndeshja e zhvilluar në stadiumin “Fadil Vokrri” dhuroi emocione dhe ritëm të lartë loje, por në fund ishte skuadra turke ajo që festoi sigurimin e biletës për në Botëror.
Në minutat e para të takimit, Turqia u shfaq më këmbëngulëse në sulm, ndërsa pas rreth 20 minutash Kosova filloi të rrisë ritmin dhe të krijojë më shumë hapësira në fushë.
Rasti më i rrezikshëm për vendasit në pjesën e parë erdhi në minutën e 29-të, kur Asllani provoi një goditje të fuqishme nga distanca, por portieri turk Çakir reagoi duke devijuar topin.
Goli që vendosi fatin e takimit erdhi në minutën e 53-të, kur Akturkoglu përfitoi nga një rast në zonë dhe e dërgoi topin në rrjetë, duke kaluar Turqinë në avantazh.
Në minutat e mbetura, Kosova u përpoq të gjente golin e barazimit, por nuk arriti të çajë mbrojtjen e organizuar të turqve.
Me këtë rezultat, Turqia siguron kualifikimin për në Kupën e Botës, ndërsa Kosova e mbyll rrugëtimin në play-off me një performancë që gjithsesi e afroi më shumë se kurrë me një kualifikim historik.
Rezultati:
Kosovë 0-1 Turqi
Shënues: Akturkoglu 53′.
