Kryeministri Edi Rama ka njoftuar se do të ndërmerret një nismë për zhvillimin e një referendumi lidhur me uljen e numrit të deputetëve në Kuvendi i Shqipërisë. Deklarata u bë gjatë fjalës së tij në mbledhjen e Asamblesë Komnëtare të Partisë Socialiste e cila po zhvillohet në hotel Melia në Gjirin e Lalzit.
Rama u shpreh se reforma për riorganizimin e Parlamentit është një nga çështjet që duhet të diskutohet drejtpërdrejt me qytetarët, duke theksuar se në plan është një reduktim i numrit të deputetëve. Sipas tij, për të realizuar këtë proces do të çohen përpara ndryshimet ligjore që mundësojnë zhvillimin e referendumeve.
Ai theksoi se procesi i diskutimeve me qytetarët do të zhvillohet nga tani deri në fund të prillit, ndërsa më pas do të vijojë deri në fund të qershorit, kur pritet të përmbyllen edhe zgjedhjet e brendshme në Partinë Socialiste.
“Ne kemi folur për riorganizimin e Kuvendit të Shqipërisë. Dhjetë legjislatura kanë hyrë dhe kanë dalë dhe nuk besoj se ka shqiptarë që do të thoshte se na duhen më shumë deputetë. Ne do ta ulim numrin e deputetëve dhe besoj se, edhe pse jemi vonë, kemi ende kohë për t’u drejtuar shqiptarëve me referendum. Për këtë arsye do të çojmë përpara edhe ligjin e munguar për referendumet, sepse ka edhe çështje të tjera që duhen vendosur përpara qytetarëve. Besoj se ligji i ri për referendumet është i realizueshëm brenda këtij sesioni,” u shpreh Rama.
Mbledhja e Asamblesë u hap nga sekretari i përgjithshëm i Partia Socialiste e Shqipërisë, Blendi Klosi, i cili në fjalën e tij bëri një analizë të situatës politike dhe rezultateve zgjedhore në qarqe, duke u ndalur te zgjedhjet e 11 majit.
Klosi theksoi se Partia Socialiste, nën drejtimin e Ramës, është më e organizuar dhe më fituese se më parë. Sipas tij, rezultati i zgjedhjeve të vitit 2025, ku PS mori 855 mijë e 831 vota në rang kombëtar, përbën një shprehje të qartë të besimit të qytetarëve ndaj qeverisjes socialiste.
Ai nënvizoi se diferenca prej rreth 300 mijë votash me kundërshtarët politikë tregon mbështetjen e fortë për drejtimin e vendit nga Partia Socialiste. Gjithashtu, Klosi theksoi se mbështetja e diasporës ka qenë e konsiderueshme, duke bërë që PS të marrë 61% të votave të shqiptarëve që jetojnë jashtë vendit.a.b
