Pas përfundimit të muajit të shenjtë të Ramazanit, besimtarët myslimanë në Shqipëri kremtojnë sot Fitër Bajramin, një nga festat më të rëndësishme të kalendarit islam.
Në Tiranë, mijëra qytetarë iu drejtuan që në orët e para të mëngjesit Sheshit “Skënderbej”, ku u zhvillua ceremonia qendrore e faljes e organizuar nga Komuniteti Mysliman i Shqipërisë. Programi nisi rreth orës 06:45 me leximin e ajeteve nga Kurani dhe ligjëratën përkatëse, ndërsa më pas besimtarët kryen faljen e namazit të Bajramit. Ndërkohë, vizitat tradicionale në selinë e Komunitetit Mysliman janë parashikuar të zhvillohen nga ora 09:00 deri në 12:00.
Në mesazhin e tij për këtë festë, kreu i Komunitetit Mysliman Shqiptar, Bujar Spahiu, vuri theksin te rëndësia e solidaritetit dhe përkujdesjes ndaj shtresave në nevojë. Ai e cilësoi Fitër Bajramin si një moment reflektimi, bashkimi dhe forcimi të vlerave njerëzore. Spahiu përcolli gjithashtu një apel për paqe, duke kujtuar situatat e vështira në zonat e konflikteve dhe vuajtjet e familjeve që përballen me pasojat e luftës.
Fitër Bajrami shënon përfundimin e agjërimit njëmujor të Ramazanit dhe lidhet ngushtë me aktin e bamirësisë. Para festës, besimtarët japin lëmoshë për familjet në nevojë, në mënyrë që gëzimi i kësaj dite të ndahet me të gjithë. Në traditën islame, kjo festë konsiderohet si shpërblim shpirtëror pas sakrificës së muajit të Ramazanit, ndërsa më vonë gjatë vitit festohet edhe Kurban Bajrami.
Një nga momentet më të rëndësishme të kësaj dite është falja e namazit të Bajramit, një ritual i veçantë që kryhet në orët e para të mëngjesit dhe që dallon nga faljet e zakonshme për nga forma dhe përmbajtja e tij. Për besimtarët, kjo është një ditë feste, lutjeje dhe afrimi me familjen dhe komunitetin.a.b
