Regjisorja dhe aktorja kosovare me famë ndërkombëtare, Luana Bajrami, është ngjitur në skenën prestigjioze të ceremonisë Academy Awards, ku së bashku me ekipin e filmit të saj të ri Two People Exchanging Saliva ka marrë çmimin për “Filmin më të mirë të shkurtër”.
Gjatë marrjes së çmimit, regjisorët dhe ekipi i filmit u shfaqën të emocionuar, ndërsa theksuan edhe prejardhjen nga Kosova të Bajramit, një prej protagonisteve të projektit. Ata nënvizuan se filmi është realizuar nga një ekip krijues ku pjesa më e madhe e anëtarëve janë gra, duke e cilësuar këtë si një arritje të veçantë për industrinë e kinemasë.
Në filmin fitues, Bajrami interpreton një personazh në një histori të vendosur në një Paris të pazakontë, ku puthjet janë të ndaluara me ligj. Rrëfimi sjell një realitet absurd dhe të ftohtë, në të cilin personazhet përballen me rregulla të pazakonta dhe kufizime të çuditshme që ndikojnë në jetën dhe marrëdhëniet e tyre.
Filmi ndërton një atmosferë të veçantë artistike, duke trajtuar temën e ndalimeve dhe kontrollit mbi ndjenjat njerëzore përmes një narrative simbolike dhe vizuale.
Fitorja në skenën e Oscars shënon një moment të rëndësishëm për karrierën e Luana Bajramit, duke e vendosur edhe më fort emrin e saj në skenën më të madhe të kinematografisë botërore dhe duke sjellë një tjetër sukses ndërkombëtar për artistët me origjinë nga Kosova.
