Deputeti i Partisë Demokratike, Gjin Gjoni, ka ngritur shqetësimin për ndotjen e rëndë mjedisore në superstradën Lezhë–Milot, pranë urës mbi lumin Mat, duke publikuar pamje nga situata e krijuar pasditen e kësaj të shtune.
Zona është përfshirë nga shtellunga të dendura tymi të zi, të shkaktuara nga djegia e gomave të përdorura që hidhen pranë brigjeve të lumit dhe më pas u vihet flaka. Tymrat kanë mbuluar rrugën dhe kanë vështirësuar ndjeshëm qarkullimin e automjeteve, duke rrezikuar edhe sigurinë e drejtuesve të mjeteve që kalojnë në këtë aks.
Në reagimin e tij, Gjoni thekson se në brigjet e lumit hidhen pa asnjë kontroll inerte dhe mbetje të ndryshme, duke e kthyer zonën në një vendgrumbullim të hapur mbetjesh. Ai nënvizon se kjo situatë është përsëritur vazhdimisht dhe se institucionet përgjegjëse, sipas tij, nuk kanë ndërhyrë për ta ndalur ndotjen.
Deputeti e cilëson këtë një skandal mjedisor, ndërsa shton se panorama që krijohet në hyrje të qytetit është tepër negative, veçanërisht në prag të sezonit turistik.
“Është pamja më e shëmtuar që i ofrohet Lezhës pikërisht në prag të sezonit turistik, kur qyteti dhe bregdeti duhet të mirëpresin vizitorë nga e gjithë Shqipëria dhe nga jashtë”, shprehet ai.
Në fund të reagimit të tij, Gjoni u bën thirrje institucioneve mjedisore dhe autoriteteve shtetërore të ndërhyjnë për të ndalur ndotjen dhe për të marrë masa ndaj abuzimeve që, sipas tij, po dëmtojnë lumin dhe mjedisin përreth.
“Lezha nuk mund të trajtohet kështu. Ku janë institucionet mjedisore? Ku është shteti për të ndalur këtë ndotje dhe këtë abuzim me lumin dhe mjedisin?”, përfundon reagimin deputeti. a.b
