Kryeministri Edi Rama ka reaguar ashpër pas incidenteve të mbrëmjes së kaluar në Tiranë, duke i bërë thirrje gjyqësorit që të mos lirojë personat e arrestuar gjatë protestës.
Në një postim në platformën X, Rama u shpreh se sapo kishte dalë nga rezidenca e artistëve në ish-shtëpinë e diktatorit, ku sipas tij fondacioni prestigjioz Art Explora mikpret të rinj nga Shqipëria, Kosova dhe vende të tjera. Ai deklaroi se i kishte gjetur artistët “të traumatizuar nga çmenduria e barbarisë së mbrëmshme”.
Kreu i qeverisë e cilësoi ngjarjen si “një sulm të verbër të një grushti të paguarish për të frikësuar qytetin dhe për të njollosur Shqipërinë”, duke akuzuar drejtuesit e protestës si nxitës të dhunës.
Rama drejtoi kritika të forta ndaj gjyqtarëve që, sipas tij, lirojnë personat e arrestuar për akte dhune. “Gjykatësit që i lirojnë këta zjarrvënës të rrezikshëm janë bashkëpërgjegjës për vandalizmat e pandodhura askund në Europë”, shkroi ai, duke shtuar se është e papranueshme që autorët e dhunës të rikthehen në rrugë.
“Turp për çdo gjykatës që rinxjerr në rrugë këta keqbërës të Shqipërisë dhe turp për qeverisjen e gjyqësorit që rri e vështron sikur Shqipëria nuk është edhe atdheu i saj!”, tha Rama duke kërkuar një standart tjetër për protestuesit e tjetër për ministrat. a.b
