Kryetari i Partia Demokratike e Shqipërisë, Sali Berisha, ka dalë në një deklaratë për mediat ku ka kërkuar dorëheqjen e menjëhershme të kryeministrit Edi Rama, duke e akuzuar për përfshirje në ato që i cilësoi si “mega-aferat më të mëdha korruptive në historinë e vendit”.
Në deklaratën e tij në një konferencë shtypi Berisha u shpreh se Rama jo vetëm që është i implikuar në skandale të rënda financiare, por sipas tij, përbën edhe pengesë për funksionimin e drejtësisë.
Ai përmendi një raport të OSBE-së të vitit 2014, për të cilin pretendoi se lidhte emrin e Ramës me shuma të mëdha parash në banka offshore, duke theksuar se, sipas tij, kryeministri nuk ndërmori asnjë hap ligjor për t’iu përgjigjur këtyre akuzave.
Berisha ngriti gjithashtu pretendime mbi pasuritë e familjes së kryeministrit, duke përmendur rezidencën në Surrel dhe një pallat në Tiranë, për të cilat ai pretendoi se janë ndërtuar në kundërshtim me ligjin dhe si rezultat i favoreve korruptive.
Në vijim, kreu i PD-së akuzoi Ramën për përfshirje në aferën e inceneratorëve, duke veçuar projektin e Tiranës, si dhe për projekte të tjera madhore, përfshirë zhvillimin e portit turistik në Durrës dhe ndërtimin e portit të ri në Porto Romano. Sipas Berishës, këto projekte përfshijnë shifra miliardëshe dhe kërkojnë hetim parlamentar. a.b
