Matilda Qurku
Ka përfunduar procesi i numërimit të votave për zgjedhjen e kryetarit të degës së Partia Demokratike e Shqipërisë në Sarandë.
Sipas rezultatit përfundimtar, në krye të degës u zgjodh Matilda Qurku, e cila siguroi 145 vota nga anëtarët pjesëmarrës në proces. Kandidati tjetër, Kreshnik Shehu, mori 64 vota, ndërsa 6 fletë votimi u shpallën të pavlefshme.
Procesi i votimit u zhvillua në një klimë të qetë dhe me pjesëmarrjen e 215 votuesve nga 1280 anëtarë të regjistruar, të cilët ushtruan të drejtën e tyre për të zgjedhur drejtuesin e ri të degës.
Pas përfundimit të numërimit, komisioni përkatës shpalli zyrtarisht rezultatin, duke formalizuar zgjedhjen e kryetares së re për mandatin e ardhshëm. Në fjalën e saj, Matilda Qurku falënderoi anëtarësinë për besimin e dhënë dhe u angazhua për forcimin dhe bashkimin e strukturave të kësaj force politike në Sarandë. m.k
