Kryeministri Edi Rama ka lajmëruar sot se në mbledhjen e parë të Grupit Parlamentar të PS do të paraqesë propozimet për ndryshime në kodin penal pas mosvendimit sipas tij të Gjykatës Kushtetuese të Shqipërisë lidhur me pezullimin nga detyra të një ministri në kuadër të një mase sigurimi penal.
Në një qëndrim publik, Rama theksoi se çështja nuk ka të bëjë me individin konkret, por me parimin e ndarjes së pushteteve. Sipas tij, situata e krijuar ka nxjerrë në pah një boshllëk ligjor dhe institucional përsa i përket kufijve të kompetencave mes pushtetit gjyqësor dhe atij ekzekutiv.
Kryeministri nënvizoi se drejtësia ka të drejtë të vendosë masa sigurimi për çdo person nën hetim dhe se askush nuk është mbi ligjin. Megjithatë, ai argumentoi se funksioni i ministrit është i padelegueshëm dhe pezullimi i tij sjell pasoja të barabarta me shkarkimin, duke paralizuar ushtrimin e funksionit.
Sipas Ramës, emërimi dhe shkarkimi i ministrave është kompetencë ekskluzive e pushtetit ekzekutiv dhe nuk mund të ushtrohet nga gjyqësori përmes një mase paraprake.
“Nuk është çështja tek personi, çështja është tek parimi i ndarjes së panegociueshme të pushteteve kushtetuese. Një vendim gjyqësor për pezullimin nga detyra të një ministri prodhon në fakt të njëjtën pasojë si shkarkimi, sepse nuk pezullohet thjesht personi, por funksioni. Pavarësia e drejtësisë është e padiskutueshme, por ajo mbaron aty ku fillon pavarësia e pushteteve të tjera,” u shpreh Kryeministri.
Ai bëri me dije se, pas mosmarrjes së një vendimi nga Gjykata Kushtetuese për rastin konkret, do të ndërmerret një nismë ligjore për të saktësuar me gërmë të ligjit këtë çështje. Rama njoftoi se të hënën, së bashku me kryetarin e Grupit Parlamentar Taulant Balla dhe kryetarin e Komisionit të Ligjeve Ulsi Manja, do të depozitojnë një nismë me tre firma për të adresuar boshllëkun e evidentuar.
Sipas tij, nisma do të prezantohet fillimisht në Grupin Parlamentar dhe më pas publikisht, në prani të medias, për të garantuar transparencë të plotë për opinionin publik. a.b
