Pamje nga ofiçina
Policia e Beratit ka finalizuar operacionin e koduar “Çmontimi”, duke zbuluar në Dimal dy subjekte ku çmontoheshin dhe shiteshin pjesë automjetesh të dyshuara si të kontrabanduara, kryesisht nga Mbretëria e Bashkuar.
Si rezultat i kontrolleve dhe hetimeve të kryera nga specialistët e Seksionit për Hetimin e Krimeve Ekonomiko-Financiare, në bashkëpunim me Forcën e Posaçme Operacionale dhe në koordinim me Prokurorinë e Beratit, u sekuestruan gjithsej 68 automjete, pjesërisht të çmontuara.
Sipas policisë, në njërin subjekt u gjetën 55 automjete, ndërsa në tjetrin 13, për të cilat pronarët nuk posedonin dokumentacion blerjeje apo dokumente doganore. Dyshohet se mjetet janë futur në vend në mënyrë të kundërligjshme dhe më pas janë çmontuar për t’u shitur pjesë këmbimi.
Në kuadër të operacionit u arrestua në flagrancë shtetasi P. D., 30 vjeç, banues në Dimal, pronar i njërit prej subjekteve. Ndërkohë, është shpallur në kërkim shtetasi R. S., 31 vjeç, banues në Kuçovë, pronar i subjektit tjetër.
Policia bën me dije se vijon puna për kapjen e 31-vjeçarit, ndërsa materialet procedurale i janë referuar Prokurorisë së Beratit për veprime të mëtejshme.
