Pamje nga protesta
Reuters i ka bërë jehonë protestës së tretë kombëtare të opozitës para Kryeministrisë, duke theksuar se vazhdimësia e tyre përbën një kërcënim për stabilitetin e pushtetit të kryeministrit Edi Rama.
Sipas Reuters, protestuesit antiqeveritarë u përleshën me policinë në kryeqytetin e Shqipërisë, Tiranë, të martën në mbrëmje, ndërsa mijëra persona u mblodhën për të kërkuar dorëheqjen e zëvendëskryeministres për shkak të korrupsionit të dyshuar.
Demonstruesit hodhën bomba molotov drejt një ndërtese qeveritare, ndërsa policia u përgjigj me topa uji. Agjencia britanike shkruan se këto protesta të dhunshme përbëjnë një kërcënim për stabilitetin e pushtetit afatgjatë të kryeministrit Edi Rama, i cili ka ardhur në detyrë në vitin 2013.
Tensionet politike janë përshkallëzuar që prej muajit dhjetor, pasi një njësi e prokurorisë speciale ngriti akuza ndaj zëvendëskryeministres Belinda Balluku për ndërhyrje të dyshuara në tenderë publikë për projekte të mëdha infrastrukturore dhe favorizim të kompanive të caktuara, akuza të cilat ajo i ka mohuar.
Mijëra protestues të mbledhur në sheshin kryesor të Tiranës mbanin flamuj dhe banderola, duke brohoritur “Rama shko në shtëpi, kjo qeveri e korruptuar duhet të japë dorëheqjen”. Ndërkohë, forcat speciale të policisë, të pajisura për përballimin e trazirave, rrethuan dhe mbrojtën godinën e qeverisë.
Reuters thekson gjithashtu se Prokuroria e Posaçme, e ngarkuar me luftën kundër korrupsionit dhe krimit të organizuar, ka kërkuar këtë javë që Kuvendi t’i heqë imunitetin Ballukut për të hapur rrugën e arrestimit të saj. Megjithatë, mbetet e paqartë se kur parlamenti do të votojë për këtë çështje, duke qenë se partia e kryeministrit Rama zotëron shumicën e vendeve.
