Nga përgjimet e grupit
Policia e Tiranës ka finalizuar me sukses operacionin policor të koduar “Lockdown”, pas një hetimi dy mujor të ndjekur me metoda proaktive nga Komisariati i Policisë Nr. 3, në bashkëpunim me Prokurorinë pranë Gjykatës së Shkallës së Parë të Juridiksionit të Përgjithshëm Tiranë.
Si rezultat i operacionit, u godit një grup kriminal që dyshohet se trafikonte dhe shiste armë zjarri në Tiranë, të siguruara kryesisht nga Kosova. Në pranga ranë 4 shtetas, të gjithë banues në kryeqytet.
Të arrestuarit janë Rezarto Rumi, Kelvin Caushi, Ardjan Caushi si dhe Gloris Nezaj, ky i fundit me të shkuar kriminale.
Nga hetimet rezulton se këta shtetas, pasi siguronin armë zjarri nga Kosova, i sillnin në Tiranë, ku më pas armët modifikoheshin, montoheshin dhe magazinoheshin në një ambient të përshtatur në zonën e Selitës.
Gjatë kontrolleve në ambientin e përdorur për montimin e armëve, si dhe në banesat e të arrestuarve, shërbimet e Policisë sekuestruan 8 armë zjarri, konkretisht 5 pistoleta dhe 3 automatikë, pjesë të ndryshme armësh, një armë gjahu, krehra dhe municion luftarak, 3 radio të ngjashme me ato të Policisë, një jelek multifunksional si dhe 9 telefona celularë, të cilët u sekuestruan në cilësinë e provës materiale.
Nën drejtimin e Prokurorisë, hetimet vijojnë për identifikimin dhe kapjen e personave të tjerë të përfshirë në këtë veprimtari kriminale.
Materialet procedurale i janë referuar Prokurorisë pranë Gjykatës së Shkallës së Parë të Juridiksionit të Përgjithshëm Tiranë, për veprime të mëtejshme ligjore.
