Zyrat e “Evita”
Struktura e Posaçme Kundër Korrupsionit dhe Krimit të Organizuar (SPAK), në bashkëpunim me Byronë Kombëtare të Hetimit (BKH), ka zhvilluar kontrolle dhe bastisje në ambientet e kompanisë “Evita”, e administruar nga Alqi Jani në pronësi të Klodian Allajbeut.
Kontrollet janë kryer me urdhër të prokurores së Posaçme, Dorina Bejko. Burime bëjnë me dije se veprimet hetimore lidhen me hetimet e SPAK mbi koncesionet në sektorin e shëndetësisë.
SPAK po heton disa nga koncesionet më të debatuara në këtë sektor, përfshirë atë të sterilizimit, hemodializës dhe kontrollit të detyrueshëm shëndetësor (check-up). Këto koncesione janë kontestuar gjerësisht në opinionin publik, pasi dyshohet se janë fituar në mënyrë të paligjshme dhe se përfshijnë abuzime financiare që kapin vlera prej qindra milionë eurosh.
Në kuadër të dosjes së sterilizimit, SPAK po heton ish-ministrin e Shëndetësisë Ilir Beqaj, si edhe 11 zyrtarë të tjerë të këtij institucioni. Hetimet përfshijnë pajisjet mjekësore dhe marrëveshjen e lidhur në vitin 2015, në kohën kur Beqaj drejtonte Ministrinë e Shëndetësisë, detyrë të cilën e mbajti deri në vitin 2017. a.b
