Gjykata e Posaçme e Apelit për Korrupsionin dhe Krimin e Organizuar vendosi këtë të enjte pezullimin e dënimit me burg për pesë ish-zyrtarë të Bashkisë së Tiranës, të akuzuar në një nga fraksionet e dosjes së njohur si “5D”.
Trupa gjykuese e përbërë nga kryesuesja Miliana Muça dhe anëtaret Saida Dollani e Tereza Merkaj la në fuqi vendimin e dhënë nga Gjykata e Shkallës së Parë, por ndryshoi mënyrën e ekzekutimit të dënimit.
Apeli konfirmoi dënimet me burg për Eglantina Qytën, Enkelejda Qytën, Bruno Koçin, Rivjola Baxhën dhe Kristo Zhulatin, por vendosi pezullimin e ekzekutimit të tyre dhe kalimin në shërbim prove. Të pandehurit janë shpallur fajtorë për veprën penale “Shkelja e barazisë së pjesëmarrësve në tendera apo ankande publike”, e kryer në bashkëpunim, raporton droni.al
Sipas vendimit, pesë ish-zyrtarët do të qëndrojnë në shërbim prove për një periudhë 12-mujore, me detyrimin për t’u paraqitur rregullisht pranë Shërbimit të Provës dhe për të mos kryer vepra të tjera penale.
Po ashtu, Apeli ka vendosur heqjen e së drejtës për të ushtruar funksione publike për një periudhë prej 5 vitesh për secilin prej tyre.
Vendimi u shpall në Tiranë dhe mund të ankimohet me rekurs në Gjykatën e Lartë brenda 15 ditëve.
