PD i kërkon KLGJ dhe ILD largimin e gjyqtares Irena Gjoka pas konfirmimit të dënimit në Greqi.
Pasi Prokuroria e Përgjithshme konfirmoi zyrtarisht se gjyqtarja e Gjykatës së Posaçme, Irena Gjoka, rezulton e dënuar në shtetin grek dhe se këtë fakt e ka fshehur në formularët e vetëdeklarimit, Grupi Parlamentar i Partisë Demokratike i është drejtuar Këshillit të Lartë Gjyqësor (KLGJ) dhe Inspektorit të Lartë të Drejtësisë (ILD), duke kërkuar zbatimin e Kushtetutës dhe ligjit për largimin e saj nga detyra.
Në shkresën e firmosur nga kreu i Grupit Parlamentar të PD, Gazment Bardhi, theksohet se konfirmimi nga autoritetet përgjegjëse e vendos gjyqtaren Gjoka në kushtet e papajtueshmërisë me funksionin kushtetues të gjyqtarit, sipas nenit 6/1 të Kushtetutës dhe ligjeve nr. 95/2016 dhe nr. 96/2016. Sipas opozitës, mosdeklarimi i dënimit penal dhe i urdhrave të dëbimit përbën edhe falsifikim dokumentesh, duke krijuar një gjendje paligjshmërie dhe antikushtetutshmërie në sistemin gjyqësor.
Deputetët e opozitës shprehin shqetësim për mosveprimin në kohë të KLGJ dhe ILD, duke theksuar se çdo vonesë sjell pasoja të rënda për sistemin e drejtësisë dhe besimin e qytetarëve. Ata kërkojnë që institucionet përkatëse të konstatojnë menjëherë mbarimin e statusit të magjistrates për Irena Gjokën, në përputhje me detyrimet kushtetuese dhe ligjore.
Në përfundim, opozita nënvizon se në shkresë citohen dispozita të plota kushtetuese dhe ligjore që ndalojnë ushtrimin e funksionit të gjyqtarit nga persona të dënuar me vendim gjyqësor të formës së prerë.a.b
