Irena Gjoka
Prokuroria e Përgjithshme ka përfunduar procesin e verifikimit të thelluar për gjyqtaren e Gjykatës së Posaçme Kundër Korrupsionit dhe Krimit të Organizuar, Irena Gjoka (Shpata, Maneku), lidhur me deklarimet e saj në Formularin e Vetëdeklarimit të datës 22.04.2016.
Procesi i verifikimit është regjistruar më 8 maj 2024 në Sektorin e Dekriminalizimit të Prokurorisë së Përgjithshme, me nr. 40, mbi bazën e kërkesës së Komisionit të Zhvillimit të Karrierës në Këshillin e Lartë Gjyqësor. Verifikimi ka pasur në fokus shqyrtimin e plotë të deklarimeve të subjektit, si brenda ashtu edhe jashtë territorit të vendit.
Pas përfundimit të të gjitha verifikimeve të mundshme, më 19 janar 2026, Prokuroria e Përgjithshme ka miratuar rezultatet e këtij procesi. Vendimi i miratimit i është përcjellë po në të njëjtën datë Këshillit të Lartë Gjyqësor, i cili është organi përgjegjës për vlerësimin e kushteve të ndalimit, në zbatim të ligjit nr. 138/2015 “Për garantimin e integritetit të personave që zgjidhen, emërohen ose ushtrojnë funksione publike”, si dhe të Vendimit të Kuvendit nr. 17/2016, që përcakton rregullat e detajuara për zbatimin e këtij ligji.
Këshilli i Lartë Gjyqësor pritet të shqyrtojë rezultatet e verifikimit dhe të marrë vendimin përkatës në përputhje me kuadrin ligjor në fuqi.a.b
