Pamje nga kërkimet në lumin Mat
Polumbarët e RENEA-s, në bashkëpunim me shërbimet e Policisë, po vijojnë prej disa ditësh kërkimet në lumin e Matit për gjetjen e 30-vjeçarit Jurgen Karaj.
Operacioni ka nisur që më 10 janar 2026, pas dyshimeve se i riu është marrë nga rrjedha e përroit të fshatit Dars dhe më pas ka përfunduar në lumin Mat.
Në terren janë angazhuar polumbarët e RENEA-s, Forca Kombëtare e Sigurisë dhe Forca e Posaçme “Shqiponja”.
Po ashtu, në kërkime marrin pjesë shërbimet e Policisë së Dibrës dhe Komisariatit të Policisë Mat.
Të përfshira janë edhe strukturat e Mbrojtjes nga Zjarri dhe Shpëtimi si dhe përfaqësues të Forcave të Armatosura.
Kërkimet po zhvillohen përgjatë shtratit të lumit nga të dyja anët.
Në operacion janë bashkuar edhe forca vullnetare dhe familjarë të 30-vjeçarit.
Pavarësisht angazhimit të gjerë, deri më tani nuk ka asnjë gjurmë të tij.
Autoritetet bëjnë me dije se kushtet e terrenit janë të vështira.
Kërkimet do të vijojnë pa ndërprerje deri në zbardhjen e plotë të ngjarjes. a.b
