Ish-kreu i Burgut të Durrësit, Indrit Cërloj, është arrestuar mesditën e sotme me kërkesë të Prokurorisë së Durrësit, vetëm një ditë pasi ishte shkarkuar nga detyra. Ai dyshohet për përfshirje në skandalin e arratisjes së të dënuarit Altin Ndoci.
Burime nga hetimi bëjnë me dije se arrestimi i Cërlojt vjen në kuadër të zgjerimit të hetimeve për zbardhjen e rrethanave të arratisjes, një ngjarje që ka ngritur dyshime serioze për shkelje të rënda të procedurave të sigurisë dhe bashkëpunim nga persona përgjegjës.
Sipas të dhënave paraprake, rezulton se Altin Ndoci nuk ka kryer asnjë vizitë mjekësore në spitalin e Durrësit, ndonëse kjo ishte arsyeja zyrtare e nxjerrjes së tij nga institucioni i vuajtjes së dënimit. Ky fakt ka forcuar dyshimet e prokurorisë se procedura është përdorur si justifikim për realizimin e arratisjes.a.b
