Pas pezullimit të programit të Lotarisë Amerikane, Departamenti i Shtetit i SHBA (DASH) ka njoftuar se duke nisur nga 21 janari, do të pezullohet shqyrtimi dhe dhënia e vizave të emigracionit për Shqipërinë.
Vendimi bazohet në një memorandum të brendshëm të Departamentit të Shtetit, të publikuar fillimisht nga Fox News Digital, i cili u kërkon zyrtarëve konsullorë të refuzojnë aplikimet për viza sipas legjislacionit ekzistues, ndërkohë që po kryhet një rishikim i plotë i procedurave të kontrollit dhe verifikimit. Pezullimi do të jetë pa afat të përcaktuar, deri në përfundimin e këtij rivlerësimi.
Masa lidhet edhe me zbatimin e rregullave të reja të kontrollit sipas dispozitës së njohur si “public charge”, e cila parashikon refuzimin e vizave për aplikantët që vlerësohen se mund të bëhen barrë për sistemin e përfitimeve publike në SHBA. Në këtë vlerësim merren parasysh faktorë si gjendja shëndetësore, mosha, njohja e gjuhës angleze, situata financiare dhe nevoja e mundshme për kujdes shëndetësor afatgjatë.
Një zëdhënës i Departamentit të Shtetit deklaroi se institucionet amerikane do të përdorin autoritetin ligjor për të shpallur të papërshtatshëm emigrantët e mundshëm që mund të përfitojnë nga ndihmat publike.
Sipas Fox News, Shqipëria është një nga 75 vendet për të cilat do të pezullohet dhënia e vizave të emigracionit duke nisur nga 21 janari, së bashku me vende të tjera nga Europa, Afrika, Azia dhe Amerika Latine. a.b
