Spitali i Fierit
Një ngjarje e rëndë është shënuar mbrëmjen e 10 janarit rreth orës 23:30, në fshatin Vjosë, Njësia Administrative Cakran, Bashkia Fier, ku persona të armatosur kanë sulmuar brenda banesës së tyre Ylli Meçen, 81 vjeç, dhe djalin e tij Altin Meçe, emigrant prej vitesh në Gjermani.
Të dy të dëmtuarit ndodhen të shtruar në Spitalin e Fierit, ndërsa gjendja e tyre shëndetësore mbetet e paqëndrueshme. Deputeti Luan Baçi denoncon se familjarët akuzojnë si autorë punonjës të Komisariatit të Policisë Fier, të denoncuar edhe me emra.
Sipas Baçit, në spital mungon prania e policisë për të garantuar sigurinë e të dëmtuarve, ndërsa ka shqetësime për tentativa të manipulimit të ngjarjes. Ai i bën thirrje Prokurorisë dhe drejtuesve të policisë për një hetim të plotë, transparent dhe të drejtë, duke kërkuar vënien para përgjegjësisë të autorëve.
