Presidenti i Venezuelës, Nicolás Maduro, dhe bashkëshortja e tij, Cilia Flores, janë arrestuar gjatë një operacioni të forcave amerikane, pasi u nxorën nga dhoma e tyre e gjumit në orët e para të mëngjesit, bëjnë me dije dy burime të njohura me çështjen. Sipas tyre, çifti u kap në mesnatë, teksa ndodhej në gjumë, raporton CNN.
Operacioni u krye nga njësia elitare Delta Force e Ushtrisë Amerikane dhe, sipas një zyrtari amerikan, nuk pati viktima në radhët e forcave të SHBA-së. Në aksion mori pjesë edhe një ekip agjentësh të FBI-së, të cilët shoqëruan forcat speciale gjatë kapjes së presidentit venezuelian.
Burime të informuara bëjnë të ditur se autoritetet amerikane po hartojnë planet për transferimin e Nicolás Maduro-s në Nju Jork, ku ai pritet të përballet me akuza në Gjykatën Federale të Manhattanit. Administrata Amerikane për Zbatimin e Ligjit kundër Drogës (DEA) ka punuar prej vitesh për ndërtimin e një dosjeje penale ndaj Maduros dhe disa drejtuesve të lartë ushtarakë të Venezuelës, sipas zyrtarëve amerikanë të zbatimit të ligjit.
Presidenti i SHBA-së, Donald Trump, deklaroi se Maduro dhe bashkëshortja e tij ndodhen në bordin e anijes ushtarake USS Iwo Jima, e cila po lundron drejt Nju Jorkut. “Po, janë në Iwo Jima. Ata do të shkojnë në Nju Jork. U nxorën me helikopterë dhe udhëtuan me helikopter — jam i sigurt se u pëlqeu shumë. Por mos harroni, ata kanë vrarë shumë njerëz”, tha Trump në një intervistë telefonike për Fox News.
I pyetur për mundësitë e dorëzimit që i ishin ofruar Maduros, Trump u shpreh: “Në thelb i thashë: duhet të dorëzohesh. Duhet të dorëzohesh”. Ai shtoi se kishte folur me Maduron rreth një javë më parë. “Ishte një simbol shumë i rëndësishëm. Unë fola personalisht me të dhe i thashë se duhej të dorëzohej”, deklaroi Trump.
Presidenti amerikan përshkroi edhe momentet e kapjes, duke thënë se Maduro ndodhej në një banesë të fortifikuar. “Ishte më shumë si një fortesë sesa një shtëpi. Kishte dyer çeliku dhe një hapësirë sigurie të ndërtuar tërësisht me çelik. Ai po përpiqej të futej aty, por u kap aq shpejt sa nuk ia doli”, tha Trump.
Duke iu referuar zhvillimeve të javëve të mëparshme, Trump theksoi se Maduro kishte kërkuar negociata, por ato u refuzuan. “Në fund ai donte të negocionte, por unë nuk doja. I thashë: ‘Jo, duhet ta bëjmë’. Ai u përpoq fort për një marrëveshje, por unë thashë jo”, përfundoi presidenti amerikan.
