Lumi i Gjanicës në Fier
Prokuroria pranë Gjykatës së Shkallës së Parë të Juridiksionit të Përgjithshëm Fier ka mbyllur hetimet dhe ka dërguar për gjykim drejtorin, së bashku me disa specialistë të Agjencisë Rajonale të Mjedisit Fier/Vlorë/Gjirokastër, të cilët akuzohen për veprën penale të “shpërdorimit të detyrës”, të kryer në bashkëpunim.
Sipas Prokurorisë, nga hetimet është provuar se të pandehurit kanë vepruar në kundërshtim me ligjin, duke neglizhuar detyrat e tyre funksionale, pavarësisht rekomandimeve të përsëritura të Kontrollit të Lartë të Shtetit dhe gjetjeve të auditimeve të brendshme të Ministrisë së Mjedisit.
Organi i akuzës bën me dije se drejtori dhe specialistët kanë miratuar apo refuzuar leje mjedisore të tipit “C” në shkelje të kritereve ligjore dhe nënligjore, pa kryer kontrolle në terren dhe, në disa raste, edhe pa dokumentacionin e nevojshëm.
Hetimet kanë evidentuar gjithashtu përdorimin e standardeve të ndryshme në procesin e vendimmarrjes, duke favorizuar subjekte të caktuara dhe duke penalizuar të tjera pa bazë ligjore.
Po ashtu, është konstatuar se një numër i madh subjektesh të pajisura me leje mjedisore nuk kanë paraqitur raportet e detyrueshme të vetëmonitorimit, ndërsa Agjencia Rajonale e Mjedisit nuk ka marrë masa për pezullimin apo revokimin e këtyre lejeve, në kundërshtim me parashikimet ligjore. a.b
