Kreu i PD, Sali Berisha tha sot në një konferencë për shtyp se PD nis një mision të ri të vërtetë! Kjo është një foltore ku do flasin deputetët dhe qytetarët ndërsa kujton se me 46 protesta Veliaj përfundoi në qeli.
“Kjo është foltore në të cilën do flasin deputetët, do flasin qytetarët dhe qëllimi i saj është të ftojmë shqiptarët dhe të bindim shqiptarët se rruga e vetme për ata që duan të votojnë të lirë është protesta.
Nuk është një punë e thjeshtë. Nuk është një moment.
Ne hapim siparin e protestave.
Do punojmë fort për protesta të mëdha, për protesta kombëtare, për protesta të qëndrueshme.
Ky është vetëm hapi i parë në këtë alternativë që është e vetmja.
Nuk ka një alternativë të dytë.
Ndaj dhe ata që vijnë sot, unë i falënderoj me shumë mirënjohje dhe i ftoj të vijnë sepse çelim siparin e një përpjekje të re të madhe në përputhje me idealet tona për rikthimin e votës së lirë, në një mision të ri të vërtetë.
Ne nisim një mision të ri të vërtetë.
Çdo njeri që vjen do mendojë se është misionar.
Siç ishin misionarë ata që nuk u lodhën, por shkuan 46 protesta tek bashkia gjersa Lali Vjedhësi përfundoi aty ku e ka vendin.
Edi Rama e ka shumë më tepër vendin atje, por kjo nuk bëhet përnjëherësh”, u tha Berisha gazetarëve. a.b
