Prefekt në Vlorë deri para pak javësh, analisti Plator Nesturi ka bërë sot një deklaratë të fortë, duke folur për lëvizje brenda PS dhe në qeverinë Rama, ndërsa nuk përjashtoi as mundësinë e një kryeministri tjetër. Ai tha në “Log” në News 24 se këto lëvizje kanë nisur tashmë.
“Ka ardhur koha për të bërë një lëvizje të thellë ndryshimi, ku edhe ai socialisti më i thjeshtë ndihet keq kur sheh se si lëvizin ata dhe nuk e ndjen veten se është i tij. Besoj se brenda PS do të ketë lëvizje të re, që mund të jetë e dhimbshme dhe ka shansin ta bëjë”, deklaroi ish-prefekti i Vlorës, Plator Nesturi.
Më tej, ai shtoi: “Dua të kujtoj edhe intervistën e fundit të Gonzatos. Ai u shpreh në mbrojtje të SPAK dhe kundër çdo ndërhyrjeje të karakterit kushtetues për t’i kufizuar kompetencat. Edhe BE është kontributor i SPAK, financiarisht dhe në logjistikë.”
Sipas Nesturit, Shqipëria është në rrugën e integrimit dhe sulmi i Berishës ndaj Gonzatos shihet edhe në këtë kontekst. Ai thekson se faktorët ndërkombëtarë kanë penguar nisma që synonin izolimin apo dobësimin e SPAK.
“Sa më shumë kalon koha, më duket imediate përpjekja për të zvogëluar SPAK. Edhe pse nuk pranohet publikisht, ka një interes të përbashkët ndërmjet dy aktorëve politikë. Ka ardhur koha për të bërë një lëvizje të thellë ndryshimi, sepse edhe socialisti më i thjeshtë nuk mund të paguajë kostot e të tjerëve,” u shpreh ai.
Nesturi theksoi se lëvizjet brenda PS-së nuk mund të kufizohen vetëm në ndryshime fytyrash: “Nëse shumë ministra apo zëvendëskryeministra dalin në hetime dhe kanë problematika ligjore, është në nderin e PS-së të sjellë emra dhe një fizionomi të re. Nuk e përjashtoj as mundësinë e ndryshimeve në qeveri, madje as të një kryeministri tjetër.”
Ai shtoi se brenda PS ka nisur një lëvizje e brendshme, pasi “nuk ka pse t’i paguajë kostot anëtari i thjeshtë poshtë. Partia nuk mund të qëndrojë vetëm duke pritur ç’bën SPAK, por duhet të reagojë.” BW
