Avokati Cakrani duke hyrë në gjykatë
Gjykata e Posaçme Kundër Korrupsionit dhe Krimit të Organizuar (GJKKO) ka refuzuar kërkesën e ish-presidentit Ilir Meta për lirimin nga qelia. Vendimi është dhënë të mërkurën, më 22 tetor, nga gjyqtarja Irena Gjoka, e cila rrëzoi kërkesën e Metës për shuarje të masës së sigurisë.
Pas seancës, avokati i Metës, Kujtim Cakrani, e cilësoi vendimin si tejet të rëndë dhe të padrejtë, duke theksuar se afatet ligjore të paraburgimit janë ezauruar. “Afati 1-vjeçar për mbajtjen në paraburgim ka përfunduar që dje. Teknikalitetet që përdor GJKKO për të justifikuar këtë vendimmarrje nuk kanë asnjë vlerë ligjore,” u shpreh Cakrani për mediat.
Sipas tij, vendimi i sotëm është një kambanë alarmi për sistemin e drejtësisë në Shqipëri, duke akuzuar gjyqtarët se janë kthyer në toga pushkatimi.
“Është shumë e rëndë ajo që po ndodh. Nesër do të shqyrtohet kërkesa jonë për revokimin e masës së sigurisë, pasi nuk ekziston më asnjë arsye që Ilir Meta të mbahet në paraburgim,” shtoi ai.
Avokati theksoi se nuk ka as dëshmitarë, as prova që Meta mund t’i dëmtojë apo të ndikojë mbi to.
“S’ka më asnjë mundësi që Meta të prishë prova apo të intimidojë dëshmitarë. Nuk ka as dëshmitarë dhe as prova për t’u prishur. Kjo situatë është tregues i qartë se prezumimi i pafajësisë në këtë vend nuk ekziston më,” deklaroi Cakrani.
Në përfundim, ai bëri një kritikë të ashpër ndaj sistemit gjyqësor, duke thënë: “Na duhen gjyqtarë për të bërë drejtësi të vërtetë. Nuk e di me çfarë standardi maten sot gjyqtarët… me lidhje, me dashnore, apo me urdhra politikë. Këto gjykata janë kthyer në toga pushkatimi.” a.b
