Erion Bani
Kryetari i Gjykatës së Posaçme, Erion Bani, ngriti alarmin për mungesën e sigurisë në sistemin gjyqësor, duke deklaruar se në 99% të gjykatave të vendit mungojnë kushtet e nevojshme për mbrojtjen e gjyqtarëve dhe palëve në proces.
Gjatë homazheve për gjyqtarin e Apelit, Astrit Kalaja, i cili u vra të hënën në sallën e gjyqit, Bani theksoi se të gjitha gjykatat në Shqipëri kanë nevojë për godina të reja që të garantojnë siguri dhe funksionim normal.
“Ju vetë jeni dëshmitarë, sepse mbuloni drejtësinë dhe e shihni që në 99% të gjykatave mungojnë kushtet bazë të sigurisë. Asnjë gjykatë nuk i plotëson standardet, pasi të gjitha duhet ndërtuar nga e para. Pa siguri në gjykata, nuk mund të ketë pavarësi të gjyqtarit në dhënien e vendimit — një gjyqtar që nuk ndihet i qetë, nuk mund të japë drejtësi,” deklaroi Bani, sipas A2 CNN.
Ai shtoi se siguria nuk lidhet vetëm me mbrojtjen e gjyqtarëve, por edhe të të gjithë aktorëve të tjerë në sallë — prokurorëve, avokatëve, të pandehurve, gazetarëve dhe publikut.
“Ky është një moment reflektimi për të gjithë, sepse në mungesë të sigurisë, kushdo ndihet i rrezikuar. Të gjitha gjykatat duhet të ndërtohen nga e para dhe është koha që institucionet përgjegjëse të marrin masa konkrete,” theksoi ai.
Bani njoftoi gjithashtu se të enjten do të zhvillohet një mbledhje e të gjithë gjyqtarëve të vendit, ku do të analizohen problemet dhe do të kërkohet përgjegjësi nga institucionet që nuk kanë përmbushur detyrimet e tyre ligjore.
“Sipas akteve ligjore që prej vitit 2010, në çdo sallë gjyqi duhet të ketë prani të forcave të policisë për garantimin e sigurisë. Pse kjo nuk është zbatuar, do të diskutohet dhe do të merren masa,” përfundoi kryetari i Gjykatës së Posaçme.
