Dy djemtë e Valbona Selimllarit, Deni dhe K. Selimllari, përkatësisht 21 dhe 18 vjeç, janë vënë në pranga në orët e para të mëngjesit të sotëm, 4 tetor, pas një incidenti me policinë në Tiranë.
Selimllari me djalin e madh
Sipas policisë së Tiranës, arrestimi ndodhi pasi ata goditën me grushte një efektiv policie gjatë një përplasjeje në zonën e Bllokut.
Ngjarja nisi në një lokal nate, ku të rinjtë, të ndodhur në gjendje të dehur, kishin krijuar tension dhe shqetësim për klientët dhe stafin.
Për shkak të sjelljes së tyre agresive, personeli i lokalit u detyrua t’i nxjerrë jashtë, por situata përshkallëzoi edhe më shumë jashtë lokalit. Ata vazhduan me britma dhe ofendime në rrugë, derisa një punonjës policie ndërhyri për t’i qetësuar.
Në vend të bashkëpunimit, dy vëllezërit reaguan me dhunë fizike ndaj efektivit.
Menjëherë pas incidentit, patrulla e Komisariatit Nr. 2 mbërriti në vendngjarje dhe shoqëroi Deni dhe K. Selimllarin në ambientet e komisariatit. Megjithatë, edhe atje nuk munguan problemet. Gjatë shoqërimit, të rinjtë dëmtuan një kamerë sigurie dhe derën e dhomës së shoqërimit, si dhe kërcënuan punonjësit e policisë që ndodheshin në detyrë.
Policia e Tiranës, në njoftimin zyrtar, bëri të ditur se të arrestuarit akuzohen për goditje për shkak të detyrës, dëmtim të pronës publike dhe kanosje ndaj punonjësve të rendit. Materialet e rastit i janë dërguar Prokurorisë pranë Gjykatës së Shkallës së Parë të Juridiksionit të Përgjithshëm në Tiranë për procedura të mëtejshme ligjore. m.k
