Dy inspektorë të ISHTI-t nën masë sigurie për korrupsion, me vendim të GJKKO
Prokuroria e Posaçme kundër Korrupsionit dhe Krimit të Organizuar (SPAK) ka vënë nën masë sigurie dy inspektorë të Inspektoratit Shtetëror Teknik Industrial (ISHTI), të akuzuar për korrupsion.
Me vendimin nr. 95, datë 23 shtator 2025, Gjykata e Posaçme e Shkallës së Parë miratoi kërkesën e SPAK për caktimin e masave të sigurimit personal: “Arrest në burg” për shtetasin O.J., me detyrë inspektor në ISHTI; “Arrest në shtëpi” për shtetasin L.S., ish-inspektor i ISHTI-t.
Masat u ekzekutuan më 27 shtator 2025 nga Policia e Shtetit.
Sipas SPAK, procedimi penal u regjistrua më 5 mars 2025, mbi bazën e akteve të një dosjeje të nisur në Prokurorinë e Korçës, dhe u transferua për kompetencë në SPAK. Hetimet, të kryera me metoda speciale nga Byroja Kombëtare e Hetimit (BKH), zbuluan se më 1 nëntor 2021, dy inspektorët kishin përfituar 900 mijë lekë dhe 10 mijë dollarë nga një subjekt privat në Korçë.
Shumat ishin dhënë me qëllim që inspektorët të mos vendosnin masa administrative ndaj biznesit në fjalë, i cili ushtronte aktivitet pa dokumentacionin dhe licencën e nevojshme tekniko-ligjore. a.b
