“Pjetër Budi” është shkolla 9-vjeçare në Tiranë që po ndërtohet nga themelet, falë një projekti që synon të rrisë nivelin përsa i përket procesit mësimor në tërësi, sigurisë, të optimizojë dhe të sigurojë një lëvizshmëri dhe aksesueshmëri efikase në përputhje me praktikat dhe standardet më të mira ndërkombëtare.
Shkolla ka aktualisht rreth 1000 nxënës, që zhvillojnë mësimin në 2 turne, ndërsa me ndërtimin e ri, dhe zgjerimin e mjediseve, turnet do të eleminohen dhe do të ketë 28 klasa për nxënësit e ciklit 9-vjeçar si dhe për herë të parë do shtohen 2 klasa për fëmijët e ciklit parashkollor.
Shkolla e re do të jetë e pajisur gjithashtu me bibliotekë, laboratorë, hapësira sportive multifunksionale, tarracë të gjelbër, dhomat e psikologut, e infermierisë, etj.
Për të parë ecurinë e punëve në terren, ishte sot kryeministri Rama, së bashku me Kryetaren e deleguar të Bashkisë Anuela Ristani.
“Si pjesë e shkollave që ne i kemi të rindërtuara, edhe kjo shkollë është rindërtuar e plotë dhe një nga gjërat që do të bëjmë më mirë është të shmangim komplet turnin e dytë sepse po shtojmë klasat. Deri tani ishte me 938 nxënës dhe 4 klasa ishin me turn të dytë. I kemi shtuar ato, duke ekonomizuar më mirë hapësirën me projektin dhe nuk do të ketë më turn të dytë, po përveç asaj që do të ofrojë gjelbërim edhe hapësira të ndriçimit shumë të mira, ka një shtesë të bukur të faktit që do të ketë një holl të brendshëm dhe tarracë të gjelbër. Tarraca sipër do të jetë e shfrytëzueshme dhe do të ketë dalje nga holli nëpër klasa e nëpër korridore. Tipar tjetër është që palestra është multifunksionale dhe ka një sallë tjetër multifuknsionale, me akses të jashtëm që mund të përdoret dhe për pjesën jashtë shkollës. Do të ketë bibliotekë, laboratorë dhe ajo që ne po shtojmë është edhe klasat e parashkollorit që nuk kanë ekzistuar më përpara. Mendojmë që të jetë gati brenda fundit të vitit kalendarik.” – shpjegoi Kryetarja e deleguar e Bashkisë Ristani.
Ndërsa, kryeministri Edi Rama tha se me transformimet e ndodhura në shkollat e Tiranës, është ndërtuar një model i standardeve më të mira europiane.
“Me shkollat në Tiranë kemi bërë një revolucion dhe ndërtuar një model që është i standardit më të mirë evropian, pa asnjë diskutim. Shkollat e Tiranës janë shkolla si në çdo qytet të Evropës ku ka shkolla të vjetra, ka shkolla “çka” dhe ka shkolla shumë të mira. Këto janë nga shkollat shumë të mira, pa asnjë diskutim. Është revolucion i madh.” – u shpreh ai.
