Deputeti i Partisë Socialiste, Nasip Naço, reagoi sot pas deklaratave të bëra nga i penduari i drejtësisë, Nuredin Dumani.
Ky i fundit deklaroi sot në sallën e gjyqit në GJKKO se ishte liruar nga burgu në vitin 2014 falë ndërhyrjes së dhëndrit të vëllait të Naços. Në atë kohë, Nasip Naço mbante postin e Ministrit të Drejtësisë.
Sipas Dumanit, lirimi i tij nga burgu, ku vuante dënimin për pengmarrje, u arrit përmes falsifikimit të një raporti mjeko-ligjor, në të cilin kishte ndikuar edhe dhëndri i vëllait të ish-ministrit.
Në një reagim zyrtar, Naço mohoi çdo lidhje me akuzat, duke theksuar se roli i ministrit të Drejtësisë është i kufizuar dhe nuk përfshin vendime të tilla. Ai kërkoi një hetim të plotë nga organet e drejtësisë dhe deklaroi se nëse akuzat vërtetohen, personat përgjegjës duhet të mbajnë përgjegjësi ligjore.
Reagimi i Nasip Naços:
“Jam njohur sot nga mediat ku përmendet emri im. Dua të theksoj se:
1.Distancohem nga çdo akuzë e bërë publike sot dhe ftoj organet e drejtësisë që të kryejnë një hetim të thelluar mbi këtë rast. Nëse akuzat vërtetohen, organet përkatëse duhet të marrin masa ligjore ndaj çdo personi të përfshirë në këtë çështje.
2.Roli i Ministrit të Drejtësisë, sipas legjislacionit në fuqi, është i kufizuar. Ministri:
– Nuk heton,
– Nuk ngre akuza,
– Nuk pushon çështje,
– Nuk jep vendime fajësie apo pafajësie.
Detyra e tij lidhet vetëm me dhënien e lejeve të veçanta për të dënuarit, bazuar në ligj.
3.Gjatë ushtrimit të detyrës sime si Ministër i Drejtësisë, nuk kam miratuar asnjë leje të veçantë për subjektin në fjalë.
4.Distancohem nga çdo mashtrim, i bërë nga kushdo, individualisht apo në bashkëpunim, për të dëmtuar integritetin tim. Akuzat publike të bëra sot nuk përputhen me faktet reale të ushtrimit të detyrës sime si Ministër.” a.b
/DRONI.al/
Për t’u bërë pjesë e grupit të "DRONI.al - Agjencia Kombëtare e Lajmeve" mjafton të klikoni: Join Group dhe kërkesa do t’ju aprovohet.
KOMUNITETI DRONI.AL: https://www.facebook.com/groups/426976918158037/
