Dorjan Teliti denoncoi sot parashikimet e projektbuxhetit 2025 të Bashkisë Tiranë ndërsa theksoi se janë parashikuara 90 milionë euro për të paguar 7 mijë patronazhistë.
Koordinatori për programin ekonomik në Partinë Demokratike dhe Nënkryetari i Këshillit Bashkiak Tiranë, Dorjan Teliti, ka ngritur akuza të forta ndaj Bashkisë së Tiranës, duke pretenduar se projektbuxheti i vitit 2025 parashikon një shpërdorim të madh të fondeve publike për të paguar një trupë prej 7 mijë patronazhistësh.
Në një status të publikuar në rrjetet sociale, Teliti deklaron se këta persona janë të punësuar nga “shefi politik i 5D” dhe i shërbejnë interesave të ngushta politike, ndërsa qytetarët e Tiranës paguajnë taksa të larta për t’i mbajtur ata në punë.
“90 milionë euro kostoja në buxhetin 2025 e trupës së patronazhistëve në Bashkinë e Tiranës!”, shkruan Teliti. Sipas tij, numri i të punësuarve në Bashki dhe institucionet e saj të varësisë është rritur në mënyrë të pajustifikuar nga 5 mijë në vitin 2016 në mbi 12 mijë në 2024-2025.
Ai i bën thirrje qytetarëve dhe taksapaguesve të jenë të vetëdijshëm për këtë situatë, duke theksuar se “me taksat tona po paguhen mijëra njerëz që të vetmen punë kanë të na përgjojnë, ndjekin, intimidojnë dhe tjetërsojnë vullnetin tonë si qytetarë të lirë.”
Teliti paralajmëron se këshilltarët e Partisë Demokratike do të votojnë kundër projektbuxhetit në Këshillin Bashkiak, ndërsa kërkon që qytetarët të bëhen më aktivë në mbrojtjen e interesave të tyre financiare dhe demokratike. r.p
