Reagimi i Grupit Parlamentar të Partisë Demokratike: Akuza për dezinformim ndaj Kryetares së Kuvendit
Grupi Parlamentar i Partisë Demokratike, përmes kreut të tij, Gazment Bardhi, ka reaguar sot ndaj një lajmi të shpërndarë në disa media, të cilin e cilëson si “fake news” të prodhuar nga Zyra e Kryetares së Kuvendit. Sipas Bardhit, ky lajm është paraqitur sikur të jetë qëndrim i Komisionit të Venecias, duke i shitur publikut një burim të sajuar e të pavërtetë.
“Mbajtja të fshehtë e draft-opinionit të Komisionit të Venecias, që është miratuar sot, apo përjashtimi i opozitës nga ky proces, ka patur si qëllim pikërisht dezinformimin e opinionit publik përmes prodhimit të lajmeve të pavërteta, të sajuara nga Kryetarja e Kuvendit dhe me fjali të nxjerra jashtë kontekstit të opinionit të Komisionit të Venecias”, thekson n/kryetari i PD.
Bardhi ka sqaruar më tej se trajtimi i parimit të mandatit jo detyrues nga Komisioni i Venecias apo Gjykata Kushtetuese është keqpërdorur për të mbuluar çështjen e deputetes Olta Xhaçka.
Bardhi ka sqaruar këtë alibi. “Padyshim, kur ka trajtuar parimin e mandatit jo detyrues, jo Komisioni i Venecias, por edhe vetë Gjykata jonë Kushtetuese sqaron që deputetët, si rregull, janë të lirë të votojnë sipas vullnetit të tyre. Por ky rregull sigurisht që nuk ka lidhje me çështjen në fjalë, siç Gjykata Kushtetuese ka sqaruar.”
Bardhi u ka bërë thirrje mediave që të jenë të kujdesshme në informimin e publikut, duke thënë:
“Grupi Parlamentar i PD u bën thirrje mediave që të tregohen të matura në informimin e publikut dhe të presin publikimin e opinionit të Komisionit të Venecias, apo t’i referohen vetëm burimeve zyrtare apo serioze për informim mbi këtë çështje, duke refuzuar çdo fake news që konsideron Elisa Spiropalin si Komisioni i Venecias.”
Kreu i grupit parlamentar të PD dënoi sjelljen e Kryetares së Kuvendit, duke e akuzuar për krijimin e konfuzionit publik:
“Grupi Parlamentar i PD dënon me forcë sjelljen dezinformuese të Kryetares së Kuvendit, që synon të krijojë konfuzion në opinionin publik, vetëm me qëllim që të mbrojë pandëshkueshmërinë e bashkëpunëtores së Edi Ramës, deputetes strategjike Olta Xhaçka, si dhe të fshehë faktin se për herë të parë në 34 vite Kuvendi ka refuzuar të zbatojë dy vendime të Gjykatës Kushtetuese”, thuhet në deklaratën e Bardhit. a.b
/DRONI.al/
Për t’u bërë pjesë e grupit të "DRONI.al - Agjencia Kombëtare e Lajmeve" mjafton të klikoni: Join Group dhe kërkesa do t’ju aprovohet.
KOMUNITETI DRONI.AL: https://www.facebook.com/groups/426976918158037/
