Dy avionë të Forcave të Armatosura të Rumanisë, mbërritën sot në aeroportin ushtarak të Kuçovës.
Njëri prej tyre është për shuarje zjarresh nga ajri dhe tjetri për mbështetje logjistike për të parin.
”Avionët i bashkohen përpjekjeve të forcave shqiptare nëpërmjet Mekanizmit Europian të Mbrojtjes Civile, për izolimin dhe shuarjen e vatrave.
Ekuipazhet rumune do të dislokohen për 10 ditë në Bazën Ajrore të Kuçovës, nën koordinimin e Agjencisë Kombëtare të Mbrojtjes Civile”, njoftoi sot ministria e Mbrojtjes.
Një ditë më parë BE njoftoi se Shqipëria do të marrë një avion multifunksional nga Rumania, i cili mund ta mbajë deri në 6 tonelata ujë.
Shqipëria aktivizoi Mekanizmin Evropian të Mbrojtjes Civile pasi nuk arriti të kontrollojë zjarre të shumta, të cilat kanë përfshirë jugun e Shqipërisë.
Ndihma vjen gjithashtu pasi BE ka njoftuar injektimin e 600 milionë eurove në mekanizmin mbrojtës, për të përforcuar kapacitetet zjarrfikëse nga ajri, përballë numrit në rritje të zjarreve që bien në kohë vere në Evropë. a.b
