Është qëlluar me armë sot fill pas një aktiviteti publik Kryeministri i Sllovakisë Robert Fico. Ai u qëllua me armë rreth orës 3 të pasdites.
Fico u dërgua në spital me një makinë, pa pritur ardhjen e ambulancës ndërsa i është nënshtruar operacionit.
Ende nuk dihen detaje nga gjendja e 59 vjeçarit.
Lajmi është konfirmuar nga nënkryetari i parlamentit Lubos Blaha gjatë seancës parlamentare. Deri më tani një person ka përfunduar në pranga, ndërsa policia ka rrethuar vendin e ngjarjes.
Sipas mediave të huaja atentati ndodhi në qytetin sllovak Handlova, rreth 150 kilometra në verilindje të kryeqytetit.
Sipas gazetarëve në vendngjarje janë dëgjuar disa të shtëna. Presidentja në largim e Sllovakisë, Zuzana Caputova tha se ishte e tronditur nga sulmi “brutal dhe i pamëshirshëm” ndaj kryeministrit dhe i uroi atij forcë për t’u rikuperuar.
Fico u kthye në pushtet në Sllovaki pas zgjedhjeve shtatorin e kaluar, në krye të një koalicioni populist-nacionalist. Ai është politikan socialdemokrat me prirje proruse. a.b
