Kryeministri Edi Rama u bë barrierë këtë pasdite ndaj sulmeve të opozitës në drejtim të Presidentit Bajram Begaj fill pas dekretimit nga ana e Begaj të ligjit për komisionet hetimore.
Ai ka postuar një mesazh mbështetës ku thekson se ka kaluar koha kur Presidenti punonte kundër qeverisë, duke patur parasysh presidentët e mëhershëm Bujar Nishani dhe Ilir Meta.
Postimi i Ramës: Ka perënduar me kohë koha politike kur Presidenti i Republikës bashkëudhëhiqte revolucionet imagjinare kundër qeverisë e në dëm të Shqipërisë, duke e përdorur Kushtetutën si koktej Molotov, siç do të mbarojë po njësoj, më shpejt se sa vonë, edhe ora e keqkuptimit të madh të politikës së ditës, mes punës mendore të parlamentarëve dhe aktivitetit fizik të tyre në sallën e Kuvendit të Shqipërisë!
Ky vend është në një kohë tjetër dhe ky vit është kyç për rritjen e mëtejshme të pagave, investimeve publike e atyre private, të brendshme a të huaja, turizmit që në 2023 arriti rekordin fantastik të 10 milionë vizitorëve nga jashtë, e me radhë në çdo aspekt drejt #Shqipërisë2030.
Prandaj Shqipëria s’ka asnjë sekondë për të humbur me askënd që vazhdon me orën e vjetër, duke kërkuar nëpër rrugicat e ngushta të Kuvendit a të zonës rreth tij, rikthimin e kohës së vdekur. m.k
