Studentët propozojnë dekorimin nga Presidenca të shkencëtarit të njohur shqiptar Artan Boriçi.
Presidencës së Republikës i ka mbërritur një propozim për dekorimin e shkencëtarit akademik i asociuar Artan Boriçi, në shenjë vlerësimi, respekti dhe nderimi për kontributin e pashembullt të tij në kërkimin shkencor dhe mësimdhënie”, thuhet në një njoftim të Akademisë së Shkencave.
Artan Boriçi u nda nga jeta në mënyrë të parakohshme më 26 mars 2021.
“Profesori i Fakultetit të Shkencave të Natyrës, Artan Boriçi, akademik i asociuar, humbi betejën me Covid-19, duke shkaktuar një humbje të jashtëzakonshme për familjen, të afërmit dhe miqtë; duke lënë në mes mjaft angazhime shkencore serioze dhe të mirëpritura brenda dhe jashtë vendit; duke ndërprerë ligjeratat kompetente me studentët dhe bashkëpunimet me kolegët”, thuhet mes të tjerave në kërkesën e studentëve.
Ata kanë përmenduar fondin e shkëlqyer me kërkime dhe punime shkencore, një karrierë të jashtëzakonshme, që e ka identifikuar profesor Boriçin në elitën e studimeve në fushën e fizikës dhe matematikës. Ka bashkëpunuar me sukses me disa qendra të mirënjohura të fizikës dhe matematikës në Zvicër, Gjermani e më gjerë. U bë pjesë e ekipeve të specializuara për kërkime bërthamore europiane. Ishte një prej vlerësuesve dhe paravlerësuesve të konkursit të përvitshëm për çmimin Nobel në fizikë. U ftua të bashkëpunonte dhe bashkëpunoi me agjencitë kërkimore të specializuara ngushtë nga Zvicra në Skoci.
Ai njihet si propozues i një formulimi të ri, që sot citohet me emrin Boriçi-Krojc. Studimet e tij janë pika reference brenda dhe jashtë vendit. U bë anëtar i Akademisë së Shkencave në vitin 2020. Bashkëpunoi ngushtë me institucionet shkencore si Akademia e Shkencave të Shqipërisë dhe me institucione të tjera prestigjioze si Akademia Mbretërore e Shkencave të Suedisë (për propozimin e çmimeve Nobel në fizikë), Qendra e Kërkimeve Bërthamore Evropiane CERN, Qendra e llogaritjeve intensive në Jylih të Gjermanisë etj.
Ka mbrojtur gradën doktor i shkencave matematike në ETH, Zurich, Zvicër, më 1996. Titullin profesor e ka marrë në Universitetin e Tiranës, në vitin 2010.
Punoi në drejtimet kërkimore të fizikës teorike dhe llogaritëse dhe në fushën e financës llogaritëse në Institutin Paul Scherrer të Zvicrës; në shkollën e lartë politeknike federale të Zyrihut e në Universitetin e Ediburgut (1996-2003).
Profesor Artan Boriçi ka punuar mbi 20 vjet si pedagog në Fakultetin e Shkencave të Natyrës të Univresitetit të Tiranës. Ka shërbyer si zëvendësdekan i këtij fakulteti (2012) dhe si anëtar i këshillit shkencor. Që prej vitit 2012, ai drejtonte grupin e fizikës llogaritëse dhe të energjive të larta në departamentin e fizikës. Ka udhëhequr dy teza doktorale në fushën e fizikës së thërmijave elementare.
Studentët propozues shprehiun besimin se Presidenca do ta vlerësojë profesor Boriçin, “si një shenjë e mirënjohjes së shtetit shqiptar për punën, angazhimin dhe kontributin e Tij, si një shembull për edukimin dhe frymëzimin e gjeneratave në të gjitha nivelet mësimore e studimore.
