Muhamet Rrumbullaku do drejtojë Policinë e Shtetit pas 30 vitesh karrierë në uniformat blu

Kryeminiatri Edi Rama emëroi sot në mbledhjen e qeverisë, drejtorin e Përgjithshëm të policisë së Shtetit, Muhamet Rrumbullakun, një oficer që ka 30 vite në Policinë e Shtetit.

“Zoti Rrumbullaku është oficer karriere i lartë në policinë e Shtetit që ka mbajtur e kryer shumë detyra në gjithë piramidën e Policisë së Shtetit. I vlerësuar në cdo pozicion që ka qenë dhe i vlerësuar gjithashtu dhe së fundmi në pozicionin që ka mbajtur deri javen e kaluar të drejtorit të Agjencisë së Mbikëqyrjes Policore. Është drejtori që reformoi agjencinë që është kthyer në agjenci civile dhe rezultatet e reformës kanë filluar të ndihen ndërkohë.

Zoti Rrumbullaku mban gradën e ‘Drejtuesit të Parë’ në piramidën e Policisë së Shtetit dhe plotëson të gjitha kushtet për të qenë drejtori i Përgjithshëm i Policisë së Shtetit. Në orën 16:00 do bëjmë një prezantim të gjerë të Zotit Rrumbullaku dhe dy drejtorëve të tjerë të agjencive të Ministrisë së Brendshme, drejtoreshës së re të IKMT dhe drejtorit të ri të Agjencisë së Mbikëqyrjes policore”, tha ministri i Brendshëm Bledi Çuçi, pas mbledhjes së qeverisë.

Në lidhje me deklaratën e ish drejtorit të policisë së Shteit, Gledis Nano i cili tha për mediat franceze se 14 kriminelë kishin arritur të arratiseshin për shkak të dekonspirimit të operacioneve nga policia, ministri Çuçi tha se nuk dinte gjë për rastet e dekonspirimit përderisa as vetë Nano si drejtor policie nuk ka pasur dijeni.

“Padiskutim që është shqetësuese por është pjesë e punës së përditshme që ka policia e shtetit për të pastruar rradhët e policisë nga këta elementë që dekonspirojnë operacionet.

Kur nuk e di drejtori i përgjithshëm i policisë kur ishte në detyrë, vështirë se do ta di unë. Ajo është në hapësirën e informacionit që ka ai. Ne do ta hetojmë”-tha Çuçi.

Në fakt ish drejtori e dinte dhe intervista është bërë para shkarkimit të tij nga detyra. Ngaqë e dinte e ka thënë. I çuditshëm është bishtnimi i Çuçit. r.k

/DRONI.al/