Kryetari i PD-së, Sali Berisha mori pjesë në inaugurimin e Teqesë në Homesh të Bulqizës ku të pranishëm ishin përfaqësues të nderuar nga komunitetit bektashi dhe biznesmeni i mirënjohur shqiptar në Itali, z. Shpend Ndreu.
Teqeja në Homesh u përfundua falë vullnetit të mirë dhe dëshirës së donatorit Shpend Ndreu.
Znj. Dashurie Dema-Ndreu, e ëma e donatorit Shpend Ndreu, iu uroi mirëseardhjen të gjithëve dhe “të madhin Zot” që i dha forcën dhe zemrën e madhe të bamirësisë, djalit tim.
“Nuk është ky i pari rast që djali im t’i bëjë mirë gjithkujt.
Jam krenare me ty, bir, me tri fëmijët e mi jam krenare që punojnë e jetojnë me djersën e ballit.
Kam një falënderim të veçantë për dy Baballarët që kanë ardhur për inagurimin e një teqeje që ka shkëlqyer në këtë fshat të bukur, fshat i vendlindjes ime”, tha zonja Ndreu.
Më pas përshëndeti kreu i PD, Sali Berisha i cili viri theksin tek besimi në zot si një mundësi për të përsosur vlerat.
“Teqet inspirojnë dashuri, paqe dhe besim. Vendi ynë ka nevojë të madhe, Homeshi, Dibra dhe Shqipëria sot kanë nevojë më shumë se kurrë për dashurinë tonë. Unë pasdite do të jem në Peshkopi. Kudo që të shkosh, kudo ka histori dashurie, sakrifice dhe qëndrese.
Pas largimit të armiqve shekullorë që e mbajtën të pushtuar Shqipërinë, një armik tjetër shekullor u shfaqej përballë me të cilin u përballën shqiptarët.
Për fat të keq, ky armik tjetër që është Beogradi, e ka shtrirë sot influencën më shumë se kurrë në Shqipëri dhe ndaj ne duhet të bëjmë gjithçka për ta dashur më shumë këtë vend, që këta fëmijë e të rinj ta ndërtojnë këtu jetën e tyre, sepse pasuritë që ka Bulqiza, Peshkopia, mjaftojnë për shumë herë më tepër banorë që sot kanë këto treva”, tha ndër të tjera Berisha. a.b
