Kush do jetë Presidenti i ri, Rama nis procedurën demagogjike të Presidentit konsensual

PS ka hapur lojën e zgjedhjes së Presidentit duke bërë të duket si një përzgjedhje nga të gjitha palët.

Deputetët socialist Taulant Balla, Damian Gjiknuri dhe Elisa Spiropali do të nisin konsultimet me grupet parlamentare dhe deputetët e tjerë, u vendos sot në mbledhjen e grupit parlamentar të PS me praninë e Ramës.

“Çdo deputet i PS gjatë fundjavës duhet të jetë në territor. Në 31 Mars është seanca e radhës e Kuvendit ku për të gjitha çështjet që janë në rend të ditës kemi diskutuar me deputetët për çështjet. Po afron dita që në Konferencën e Kryetarëve kuvendi të ketë një kalendar që do çojë në zgjedhjen e Presidentit të Republikës.

Jo më vonë se 24 Maji duhet të ketë filluar procedura për zgjedhjen e Presidentit të Republikës. Partia Socialiste e cila ka udhëheqësinë e këtij procesi do zhvillojë një proces, dëshira jonë është që të jetë proces i hapur konsultimesh brenda suazës së Kuvendit të Shqipërisë.

Bashkë me mua do jetë edhe kolegia Elisa Spiropali dhe kolegu im Damian Gjiknuri si të mandatuar nga grupi parlamentar për të konsultuar me grupet e tjera parlamentare me deputetët, gjithkënd që është i interesuar për një dialog konstruktiv në funksion të procesit.

Këto konsultime prej sot kanë filluar dhe brenda grupit tonë parlamentar ku deputetëve i është kërkuar që të vijnë me propozime konkrete, konfidenciale që të kemi gati një short-list të atyre që mund të jenë kandidaturat e mundshme, procesi i zgjedhjes së Presidentit përfshin edhe një proces teknik sikundër është ai i depozitimit të kandidaturave”, u shpreh deputeti Taulant Balla. a.b

/DRONI.al/