Kryetarja e LSI, Monika Kryemadhi tha sot se pas çdo proteste kundër qeverisë, Basha pret një faturë. E ftuar në emisionin ‘Pushteti’ të gazetares Juela Meçani ajo tha se ikja e të rinjve ndodh se jo vetëm Rama por edhe Basha kanë shuar shpresën në vend ndërsa vonesat e SPAK në lidhje me inceneratorët ndodh për shkak se ata duan të mbrojnë Erion Velinë.
Kryemadhi: Një nga problemet më të mëdhaja që ne diskutojmë sot është largimi i të rinjve. Dhe largimi i të rinjve dhe pse ikin? Jo se kanë punë më të mirë në Gjermani që punojnë atje në Mc Donalds por nuk kanë shpresë në Shqipëri. Sepse thonë edhe unë po të nis të protestoj sot do të dalë Lulzim Basha do të bëjë pazar do presë një faturë dhe do më tradhëtojë kauzën. Siç i ka tradhëtuar të gjitha kauzat. Ukraina i hapi lakrat për të gjithë. Si nuk më dëgjoi njeri kur thashë në Parlament, të paktën publikisht të gjithë jeni kundër Rusisë por asnjëri nuk është me shpirt kundër Rusisë. Të paktën për Ramën dhe për Bashën. Sepse janë dy promotorët kryesorë të fuqizimit të ndikimit të rus në Shqipëri. Dhe të fuqizimit të ekonomisë serbe në Shqipëri. Ku sot, mos them 100% por mbi 90 % e ushqimeve bazë në Shqipëri importohen nga Serbia”.
Për Veliajn: “Në këndvështrimin tim, zvarritja e SPAK-ut për veprimet e njëpasnjëshme është për të mbrojtur Erion Veliajn. Dhe mendoj që çdo veprim anti ligjor për mbrojtjen e Erion Veliajt nuk do të bëjë gjë tjetër vetëm do të cënojë reformën në drejtësi. Është një reformë në drejtësi që është votuar me 140 vota në 21-22 korrik të 2016. Ku partnerët tanë ndërkombëtarë kanë shpenzuar vërtetë miliona euro. Dhe ka qenë një nga tributë e mëdhaja të reformave që ka bërë Shqipëria në këto 30 vitet e tranzicionit”– u shpreh Kryemadhi.
