Ukraina ka reaguar menjëherë pas urdhërit të Putinit për tërheqje të trupave ruse nga kufiri me Ukrainën.
Ministri i Jashtëm i Ukrainës, Dmytro Kuleba, tha se “Rusia duhet të tërheqë të gjitha forcat e saj të mbetura nga kufiri i përbashkët i vendeve”, raporton BBC.
“Ne kemi një rregull: mos besoni atë që dëgjoni, besoni atë që shihni”, u tha ai gazetarëve pas raporteve që disa trupa ruse po ktheheshin në bazë, duke shtuar se “Kur të shohim një tërheqje, ne do të besojmë në një de-përshkallëzimi”.
Ai shton se rruga diplomatike që Ukraina po ndiqte me aleatët e saj po punon për të parandaluar përshkallëzimin e mëtejshëm.
Perëndimi kërkon më shumë prova për tërheqjen ruse nga sulmi mbi Ukrainën
Perëndimi është skeptik për tërheqjen e trupave ruse nga kufiri me Ukrainën duke theksuar se ka nevojë për më shumë prova dhe besueshmëri nga Moska, raporton BBC.
Sipas një njoftimi të qeverisë britanike, Rusia duhet të tregojë më shumë prova për të treguar se ajo nuk do të pushtojë vendin. Ndërkohë kryeministri Boris Johnson pritet të mbajë një takim urgjent të martën për të diskutuar qëndrimin e Mbretërisë së Bashkuar ndaj krizës.
Ndërkohë ministria e Jashtme ruse ka akuzuar perëndimin se manipuluan me alarmin për një sulm të mundshëm rus mbi ish-republikën sovjetike.
Vendimi i papritur i Putinit, Rusia tërheq një pjesë të ushtrisë nga kufiri me Ukrainën
Ministria ruse e Mbrojtjes ka thënë të martën se disa trupa të pozicionuara afër kufirit me Ukrainën, janë duke u kthyer në bazat e tyre, pas përfundimit të stërvitjeve, ka raportuar agjencia e lajmeve, Interfax.
Sipas saj, stërvitjet e shkallës së gjerë në Rusi do të vazhdojnë.
Shtetet e Bashkuara kanë vlerësuar se 130,000 ushtarë gjenden afër kufirit me Ukrainën.
Më 14 shkurt, Rusia e ka lënë derën e hapur për më shumë diskutime me qëllim të zgjidhjes së krizës.
Gjatë një takimi televiziv me presidentin rus, Vladimir Putin, ministri i Jashtëm rus, Sergei Lavrov ka thënë se “gjithmonë ka mundësi” për të arritur marrëveshje me Perëndimin për Ukrainën.
Rusia ka insistuar se nuk ka plane për pushtim, por në të njëjtën kohë kërkon garanci për çështje të sigurisë në Evropë, përfshirë atë që NATO-ja të mos zgjerohet në shtetet si Ukraina, apo ish-republika tjetër sovjetike, Gjeorgjia.
Në kërkesat e Moskës ndaj Perëndimit përfshihen edhe ato që:
Ukraina të mos pranohet në NATO
NATO-ja t’i japë fund aktivitetit ushtarak në Evropën Lindore dhe të tërheqë trupat nga Polonia dhe republikat baltike, Estonia, Letonia dhe Lituania
Aleanca veriatlantike të mos pozicionojë raketa në shtetet afër apo në kufi me Rusinë
Shtetet e Bashkuara dhe NATO-ja janë përgjigjur duke thënë se Ukraina ka të drejtë të zgjedhë aleatët e vet, mirëpo i kanë ofruar Rusisë mundësinë e negocimit rreth raketave dhe çështjeve tjera.
Nëse Rusia pushton Ukrainën, kjo nuk do të ishte hera e parë.
Rusia ka aneksuar Gadishullin ukrainas të Krimesë më 2014.
Ky vend po ashtu mbështet rebelët në konfliktet në rajonet lindore të Ukrainës, në të cilat kanë vdekur rreth 14,000 persona, raporton REL.
